बिर्तामोड , पुष १७ । नेपाली राष्ट्रिय क्रिकेट टिमका सदस्य सन्दीप लामिछाने अष्ट्रेलियामा भइरेको बिग बास लिग (बीबीएल) मा होबार्ट हुरिकेन्सको लागि खेल्न उत्साहित छन् ।

यसअघिका दुई सिजन लगातार मेलवर्न स्टार्सबाट खेलेका सन्दीपले यस सिजन नयाँ टिम होबार्ट हुरिकेन्सबाट खेल्ने लागेका हुन् । ढिलो अष्ट्रेलिया गएका र त्यहाँको सरकारी नियमअनुसार १४ दिनको अनिवार्य क्वारेन्टिन बस्नुपर्ने भएकोले सन्दीपले होबार्टको सुरुवाती ६ खेल गुमाएका थिए ।

नयाँ वर्ष २०२१ को बगमनसंगै सन्दीपले अब होबार्टका लागि खेल्ने लगभग पक्का छ । डिसेम्बर १६ मा अष्ट्रेलिया पुगेका सन्दीपले १४ दिनको क्वारेन्टिन सकाइसकेका छन् ।

सन्दीपले १४ दिनको क्वारेन्टिन सकाएको र टिममा जोइन भएको होबार्टले जनाएको छ ।

अब सन्दीपले २०२१ जनवरीमा २ मा होबार्टका लागि आफ्नो पहिलो खेल खेल्ने सम्भावना बढेको छ ।

संयोगवस सन्दीपले आफ्नै पूर्व टिम मेलवर्न स्टार्स विरुद्ध खेल्दै बीबीएलमा होबार्टका लागि डेब्यु गर्नेछन् । गत सिजन सन्दीपसँगै मेलवर्न स्टार्मा खेलेका पिटरह्याण्ड्सकम्ब अहिले होबार्टको कप्ताद्दी गरिरहेका छन् ।

होबार्टले स्टार्सविरुद्ध खेल्नका लागि घोषणा गरेको १७ सदस्यीय टोलीमा सन्दीप लामिछाने समावेश छन् । वेष्टइन्डिजका किमो पउलको स्थानमा सन्दीपलाई राखिएको होबार्टले जनाएको छ ।

यस सिजनदेखि बीबीएलमा एक खेलमा तीन जनासम्म विदेशी खेलाडी खेलाउन पाउने प्रावधान रहेको छ ।

होबार्टले स्टार्स विरुद्ध खेल्ने टिमको लिस्ट सामाजिक सञ्जालमा राख्दै टिममा एक जना नयाँ नाम आएको जनाएको छ । त्यो नाम अरु कोही नभएर सन्दीप नै भएको प्रष्ट बुझ्न सकिन्छ ।

सन्दीपले पनि क्वारेन्टिन समय सकाएपछि बिहीबार ट्वीट गर्दै होबार्टको लागि पहिलो खेल खेल्न आफू तयार भएको जनाएका छन् । नयाँ टिमको सदस्य हुन प्रतिक्षारत रहेको जनाएका छन् ।

यस सिजन ६ खेल खेलिसकेको होबार्टले ४ जित र २ हारपछि १५ अंक जोडेको छ । दोस्रो स्थानको सिड्नी थण्डर समान १५ अंक भएपनि होबार्ट रनरेटमा पछि पर्दै तेस्रो स्थानमा छ ।अनलाईनखबरबाट

तपाइको प्रतिक्रिया दिनुहोस्।