एजेन्सी । इजरायलको उत्तरपूर्वी क्षेत्रमा आयोजिक एक धार्मिक उत्सवमा भागाभाग हुँदा कम्तीमा ४४ जना मारिएका छन् । 

राष्ट्रिय आपतकालीन सेवा मागेन डेभिड आदोमका अनुसार, ला बोमर नामक उत्सवमा सहभागी अन्य धेरैजना घाइते भएका छन् । 

माउन्ट मेरोनको फेदीमा उत्सव भइरहेको थियो । 

प्रधानमन्त्री बेन्जामिन नेतान्याहुले यो भारी विपत भएको र हताहत परिवारका लागि प्रार्थना गरिरहेको बताएका छन् । 

उत्सवमा दशौं हजार मानिस सहभागी थिए । कोरोना महामारी शुरू भएयता इजरायलको यो सबभन्दा ठूलो घटना हो ।

घटनास्थलमा दर्जनौं एम्बुलेन्स पुगेका थिए । आकस्मिक सेवाहरूले भुइँमा राखिएका शवमाथि कभर लगाएका थिए । सबैलाई त्यो ठाउँ छोडेर जान प्रहरीले आदेश दिएको छ । 

प्रहरी स्रोतका अनुसार, उत्सवमा सहभागी केही मानिस भर्‍याङमा चिप्लिएर लडे अनि अरू पनि सँगै पछारिए । 

‘एक सेकेन्डको अन्तरमा यो सबै भयो । मानिसहरू लडे अनि एकअर्कालाई कुल्चिन थाले । यो एक विपत थियो,’ एक प्रत्यक्षदर्शीले बताए । 
 

अन्लाइन राखिएका भिडियोमा हजारौं मानिस खचाखच गरी उत्सवमा सहभागी बनेको अनि घटना हुँदा भागाभाग गरेको देखिन्छ । 

दशौं हजार अर्थोडक्स यहुदीहरू मेरोनमा लाग बोमर उत्सव मनाउन तीर्थयात्राका लागि पुग्ने गरेका छन् । उत्सवमा रातभरि आगो बालिन्छ अनि प्रार्थना तथा नाचगान गरिन्छ । 

उक्त शहरमा राब्बी शिमोन बार योचाइको चिहान छ । उनी दोस्रो शताब्दीका साधु थिए । उक्त चिहान यहुदीहरूको सबभन्दा पवित्र स्थानमध्ये एक मानिन्छ ।

तपाइको प्रतिक्रिया दिनुहोस्।