एजेन्सी। भारत बंगालको खाडीमा चक्रवात विकास हुने क्रममा रहेको र त्यो उत्तर सरेका खण्डमा नेपालमा ठूलो वर्षा हुने सम्भावना देखिएको मौसमविद्ले बताएका छन्।

‘यो चक्रवात् बनेर नेपालतिर आयो भने प्रदेश १ देखि ४ सम्मै पानी पार्ने सम्भावना छ,’ मौसमविद् समिर श्रेष्ठले शुक्रबार बिहान बताएका छन्।

उनका अनुसार चक्रवात् विकास भयाे र त्यसकाे असर नेपालमा पर्‍याे भने यही अक्टोबर ११/१२ तारिखतिर नेपालमा ठूलो वर्षा हुने सम्भावना देखिएको हो।

‘तर अहिलेसम्मको अवस्था हेर्दा नेपाललाई त्यति असर नगर्ला कि भन्ने देखिएको छ,’ उनले भने, ‘तर यो (आँधी) जमिनमा ठोक्किएपछि दिशा परिवर्तन गर्छ, अहिले हामी अध्ययनकै चरणमा छौं।’

मौसमविद् श्रेष्ठका अनुसार अहिले पनि पूर्वी क्षेत्रमा हल्का वर्षा भइरहेको छ। ‘हिजो राति पनि उदयपुरमा हावाहुरीसहित वर्षा भएको थियो,’ उनले भने।

मौसमविद्का अनुसार बंगालको खाडीमा रहेको त्यही न्यून चापीय क्षेत्रकै कारण नेपालबाट अझै मनसुन नबाहिरिएको हो।

मौसमविद् श्रेष्ठका अनुसार नेपालको पश्चिमी क्षेत्र लगभग प्रदेश ३ को पश्चिमी भागसम्म मनसुन बाहिरिसकेको छ, सुक्खा सुक्खा भइसकेको छ। नेपालखबरबाट

तपाइको प्रतिक्रिया दिनुहोस्।